محمد زہیر چوھان
آپ کو معلوم ہوگا کہ دنیا بھر میں حادثات کی اطلاع دینے کے لیے ایمرجنسی نمبرز کا استعمال کیا جاتا ہے، جیسے پاکستان میں پولیس کی مدد حاصل کرنے کے لیے 15 ، فوری طبی امداد کے لیے 1122 یا 115 وغیرہ کا استعمال کیا جاتا ہے۔ آپ ان نمبرز پر اپنے موبائل فون یا لینڈ لائن سے بالکل مفت کال ملا سکتے ہیں اور متعلقہ ادارے کی جانب سے آپ کو فوری امداد فراہم کی جاتی ہے۔
امریکہ اور دیگر چند ممالک میں ایمرجنسی کے لیے 911 کا استعمال کیا جاتا ہے۔ کسی بھی حادثہ کی صورت میں آپ اس نمبر پر کال کرکے فوری امداد حاصل کر سکتے ہیں۔ لیکن قوت گویائی یا سماعت سے محروم افراد اور ایسی صورت حال جب آپ کال نہ کرسکتے ہوں ، مثلاً آپ کے گھر میں مسلح ڈاکو گھس آئیں اورآپ خطرہ میں ہوں تب کیا کیا جائے؟
اس مشکل کے حل کے لیے امریکی ٹیلی کام کمپنی ورائزن کی جانب سے اعلان کیا گیا ہے کہ کمپنی جلد ایس ایم ایس ایمرجنسی سروسز کا آغاز کرے گی۔اس مقصد کے لیے مختلف کمیونیکشن سروسز فراہم کرنے والے اداروں کے اشتراک سے کام جاری ہے اور امید کی جارہی ہے کہ یہ نظام 2013 تک دستیاب ہوگا۔
ایس ایم ایس ایمرجنسی کے اس نظام کی بدولت آپ کسی بھی حادثہ کی صورت میں 911 پر ایس ایم ایس کرکے متعلقہ ادارے کو اس سے آگاہ کر سکیں گے۔ گو کہ یہ نظام ان لوگوں کے لیے انتہائی سود مند ثابت ہوگا جو سن یا بول نہیں سکتے وہیں کچھ لوگ اس کا غلط استعمال بھی کریں گے اورمحض تفریح کے لیے ایمرجنسی نمبر پر ایس ایم ایس کرکے اپنا اور متعلقہ ادارے کا وقت برباد کریں گے۔