محمد زہیر چوھان
اوبر نے پچھلے ہفتے پاکستان کے سب سے بڑے شہر کراچی میں اپنی ٹیکسی سروس کا آغاز کیا اور حیران کن طور پر کراچی کے لیے کرایہ لاہور کی نسبت کافی کم مقرر کیا گیا۔ تاہم اب لاہوریے بھی خوش ہوجائیں کیونکہ اوبر نے آج سے لاہور کے لیے کرایہ میں 30 فیصد کمی کردی ہے۔
اوبر کی جانب سے جاری کی گئی معلومات کے مطابق اب لاہور کے صارفین پہلے سے کم کرایہ میںUberGo کی سروس استعمال کرپائیں گے۔ پالیسی کے تحت اب فی کلومیٹر کرایہ 13.7 روپے کی بجائے 6.84 روپے ہوگا اور پر منٹ چارجز کو 3.7 روپے سےگھٹا کر 3.15 روپے فی منٹ کر دیا گیا ہے۔ تاہم بنیاد کرایہ، کم سے کم کرایہ اور سواری کینسل کرنے کے چارجز وہی ہیں۔
اوبر پاکستان کے نمائندہ زہیر یوسفی کے مطابق اوبر کی سروس لاہور میں تیزی سے مقبولیت پارہی ہے، اس کا اندازہ اس بات سے لگایا جاسکتا ہے کہ گذشتہ ماہ 1000 سے زائد افراد نے اپنی گاڑیاں بطور ٹیکسی سروس استعمال کرنے کی درخواست دی ہے۔ کم کرایہ کی بدولت اب زیادہ سے زیادہ افراد اوبر کی سروسز سے مستفیذ ہوسکیں گے اور ڈرائیور حضرات کو سواری کازیادہ انتظار نہیں کرنا پڑے گا۔
ڈرائیور اس سے خوش نہیں ہونگے
تاہم یہاں یہ بات قابل ذکر ہے کہ اوبر کی جانب سے کرایہ کم کرنے پر ڈرائیور حضرات کچھ زیادہ خوش نہ ہونگے کیونکہ اوبر کے بزنس ماڈل میں 75 فیصد رقم ڈرائیور کو ملتی ہے جبکہ 25فیصد رقم اوبر کمپنی کے پاس جاتی ہے۔ اب کرایہ کم ہوجانے سے ڈرائیورز کی آمدن بھی کم ہوجائے گی اور انہیں پہلے جتنے پیسے کمانے کے لیے زیادہ سے زیادہ سواریاں اٹھانا ہونگی۔