رپورٹ
پاکستان چین اقتصادی راہداری منصوبہ کے تحت 44 ملین ڈالر کی لاگت سے 820 کلومیٹر فائبر آپٹک کیبل پراجیکٹ کا آغاز کر دیا گیا ہے۔ یہ کیبل راولپنڈی سے خنجراب کے درمیان بچھائی جائے گی اوراسلام آباد، پنجاب، گلگت بلتستان اور خیبرپختون خواہ سے گذاری جائے گی۔اس پراجیکٹ کو جون 2018 تک مکمل کرنے کا اعلان بھی کیا گیا ہے۔
یہ منصوبہ پاکستان کی سپیشل کمیونیکیشن آرگنائزیشن اور چین کی ٹیلی کام کمپنی ہواوے کے باہمی اشتراک سے مکمل کیا جائے گا اور اس سے نہ صرف پاکستان کےدور دراز علاقوں تک تیز ترین مواصلاتی نظام قائم کیا جاسکے گا بلکہ چین اور پاکستان کے درمیان محفوظ ترین رابطہ بھی قائم ہوجائے گا۔
فائبر آپٹک کو گوادر تک پہنچایا جائے گا
اس کیبل پراجیکٹ کے نتیجے میں صوبہ گلگت بلتستان اور خیبر پختونخواہ میں آئی ٹی اور ٹیلی کام کے حوالے سے نئے روزگار کے مواقع بھی میسر آئیں گے ۔ پراجیکٹ کے اگلے مرحلے میں فائبر آپٹک کے نظام کو گوادر تک بڑھایا جائے گا تاکہ پاکستان چین اقتصادی راہداری کے مکمل روٹ پر تیز ترین مواصلاتی روابط قائم کیے جاسکیں۔