وٹس ایپ کا ڈیٹا اب فیس بک کے ساتھ شیئر ہوگا، مگر گھبرائیے مت

فیس بک نے جب 2014 میں وٹس ایپ کو خریدا تھا تو اس بات کی مکمل یقین دہانی کروائی تھی کہ وہ نہ تو اس پر اشتہارات دکھائیں گےا ور نہ ہی اسکا بزنس ماڈل میں کسی قسم کی تبدیلی کی جائے گی، بلکہ اسے فیس بک سے علیحدہ رکھا جائے گا۔

مگر وہ وعدہ ہی کیا جو وفا ہوجائے، وٹس ایپ کی نئی پالیسی کے تحت اب وٹس ایپ صارفین کا کچھ ڈیٹا فیس بک کے ساتھ شیئر کیا جائے گا۔ مگر زیادہ گھبرانے کی ضرورت نہیں کیونکہ ابھی یہ تمام کام صارف کی مرضی سے سرانجام دیے جائیں گےاور وٹس ایپ نے اس بات کی مکمل یقین دہانی کروائی ہے کہ صارفین کے پیغامات، تصاویر اور ویڈیوز بالکل محفوظ رہیں گی اور انہیں کسی اشتہاری کمپنی کے ساتھ شیئر ہرگز ہرگز نہیں کیا جائے گا۔

وٹس ایپ کو صارفین کی پرائیویسی کا مکمل خیال ہے

وٹس ایپ کے مطابق فیس بک کے ساتھ ڈیٹا شیئرنگ کا مقصد یہ ہے کہ آپ کو نئے دوستوں کی معلومات فراہم کی جاسکیں اور فیس بک پر اشتہارات آپ کی پسند کے عین مطابق ہوں۔ وٹس ایپ نے اس بات کی یقین دہانی کروائی ہے کہ صارفین کووٹس ایپ پر کسی قسم کے اشتہارات نہیں دکھائے جائیں گے اور انکا وٹس ایپ نمبر یا ڈیٹا بھی اشتہاری کمپنیوں کو فراہم نہیں کیا جائے گا۔

وٹس ایپ نے اس بات کا عندیہ ضرور دیا ہے کہ مستقبل قریب میں بینکوں اور دیگر سروسز کی تفصیل بجائے ایس ایم ایس شاید وٹس ایپ پیغامات کے ذریعے بھیجی جائے مگر اس بات کی یقین دہانی کروا دی گئی ہے کہ صارفین کے نمبروں پر سپیمنگ ہرگز نہیں کی جائے گی۔

وٹس ایپ نے چار سال میں پہلی بار اپنی پالیسی میں کسی قسم کی تبدیلی کی ہے، تاہم ابھی بھی یہ اختیار صارفین کے پاس ہی ہے کہ وہ اپنا ڈیٹا فیس بک کے ساتھ شیئر کرنا پسند کریں گے یا نہیں۔ ایک پاپ اپ کے ذریعے صارفین سے پوچھا جائے گا کہ وہ فیس بک کے ساتھ اپنا اکاؤنٹ منسلک کرنا پسند کریں گے یانہیں۔

مزید معلومات کے لیے آپ وٹس ایپ بلاگ دیکھ سکتے ہیں۔

اپڈیٹ:

بہت سی پاکستانی ویب سائیٹس یہ افواہ پھیلا رہی ہیں کہ شاید وٹس ایپ صارفین کے ذاتی پیغامات، گروپس، تصاویر اور ویڈیوز بھی اشتہاری کمپنیوں کو بیچ دے گی۔ مگر حقیقت میں ایسا کچھ نہیں، وٹس ایپ کی پالیسی کے تحت تمام پیغامات انکرپشن سے محفوظ کیے جاتے ہیں اور خود وٹس ایپ انتظامیہ بھی انہیں پڑھنے کی مجاز نہیں۔ لہذا آپ پریشان مت ہوں آپ کے ذاتی پیغامات، تصاویر اور ویڈیوز بالکل محفوظ ہیں۔