انسٹاگرام کیا ہے؟ اور کیا اسکی مدد سے ویڈیوز پر بھی فلٹر لگائے جاسکتے ہیں

آپ میں سے اکثر دوست انسٹاگرام کے بارے میں تو جانتے ہی ہونگے، اور جنہیں معلوم نہیں انہیں بتاتا چلوں کہ فوٹو اور ویڈیو شیئرنگ کی اس مشہور زمانہ سروس کا آغاز 2010 میں کیا گیا۔ عام سوشل نیٹورکس کے مقابلے میں انسٹاگرام کی خاص بات یہ کہ صارفین فوٹوز پر فلٹرز لگا سکتے ہیں اور یہ تصاویر چوکور شکل میں ظاہر ہوتی ہیں۔

2012 میں اس سروس کو فیس بک نے خرید لیا، تاہم اسے فیس بک میں ضم نہیں کیا گیا اور ایک علیحدہ ایپلی کیشن کے طور پر ہی استعمال کیا جاسکتا ہے۔ فی الوقت انسٹاگرام ایپلی کیشن آئی او ایس، اینڈرائیڈ اور ونڈوز فون آپریٹنگ سسٹمز کے لیے دستیاب ہے اور ایک اندازے کے مطابق اسکے صارفین کی تعداد 200 ملین کے قریب پہنچ چکی ہے۔

انسٹاگرام کی سب سے خاص بات اسکے فلٹرز ہیں، جن کی مدد سے آپ اپنی تصاویر میں نکھار پیدا کرسکتے ہیں۔ یہ فلٹرز تصویر کے رنگوں کو مزید بہتر بنانے کے ساتھ ساتھ آپ کو یہ اختیار دیتے ہیں کہ تصویر کو پرانے زمانے کے کیمروں سے مطابقت دی جائے۔ مختلف رنگوں کے امتزاج سے کسی بھی تصویر کو چند سکینڈوں میں بہتر بنایا جاسکتا ہے۔

اسی طرح یہ فلٹرز ویڈیو پر بھی لگائے جاسکتے ہیں تاہم ویڈیو کا دورانیہ 15 سیکنڈ سے زیادہ نہیں ہوسکتا ہے، اور آپ عام ویڈیو کے ساتھ ساتھ Time-lapse ویڈیوز بھی تخلیق کرسکتے ہیں۔

ٹوئٹر کی طرز پر آپ انسٹاگرام پر دوستوں کو فالو بھی کرسکتے ہیں اور اس ایپلی کیشن کے ذریعے تصاویر کو فوری طور پر فیس بک، ٹوئٹر، ٹمبلر اور بہت سے دیگر سوشل نیٹورکس پر شیئر بھی کیا جاسکتا ہے۔