محمد زہیر چوھان
دو سال قبل آج ہی کے روز آئی ٹی نامہ کا آغاز کیا گیا تھا۔ اس وقت مجھے اس بات کا بالکل اندازہ نہیں تھا کہ یہ بلاگ اتنی مقبولیت حاصل کرے گا اور نہ صرف پاکستان بلکہ دنیا بھر سے اردو پڑھنے والے قارئین کو اپنی جانب راغب کرلے گا۔ میری جانب سے اس پر مسرت موقع پر آپ تمام دوستوں کو بے حد مبارک باد۔
گو کہ آئی ٹی نامہ کے لیے گذشتہ سال کچھ اچھا نہ رہا لیکن فیس بک اور ٹوئٹر پر آئی ٹی نامہ کی مقبولیت میں کافی اضافہ ہوا۔ چند ماہ قبل آئی ٹی نامہ پر ’ٹالک‘ کے نام سے فورمز بھی بنائے گئے جہاں آپ اور ہم مل کر ٹیکنالوجی سے متعلق چھوٹے بڑے مسائل کا حل تلاش کرتے ہیں۔
گذشتہ سال میں نے عہد کیا تھا کہ آئی ٹی نامہ پر پوسٹس کی تعداد کو بڑھایا جائے گا تاکہ قارئین کو روزانہ نت نئی خبریں اور معلومات فراہم کی جاسکیں مگر افسوس کہ اس مقصد میں زیادہ کامیابی حاصل نہیں ہوسکی۔ فی الوقت آئی ٹی نامہ سے ہمیں کسی قسم کی آمدن نہیں ہوتی ، ایسی صورت میں آئی ٹی نامہ کے لکھاریوں کو معاوضہ دینا بہت محال ہے۔ اسی وجہ سے جو چند دوست کبھی کبھار کچھ لکھ بھیجتے تھے وہ بھی کنارہ کشی کرتے جارہے ہیں۔ ہم اپنی بھر پور کوشش کررہے ہیں کہ آئی ٹی نامہ کے لیے کہیں نہ کہیں سے اشتہارات حاصل کیے جائیں ، تاکہ آمدن کا کچھ ذریعہ بنے مگر فی الحال امید کی کوئی کرن نظر نہیں آتی۔
میری جانب سے آپ تمام دوستوں اور تمام معاونین کو ایک بار پھر بہت بہت مبارک باد، اگر آپ کے ذہن میں کوئی تجویز ہو یا آپ کو آئی ٹی نامہ پر کوئی خامی یا نقص نظر آئے تو ہمیں ضرور مطلع کیجئے۔ اگر آپ آئی ٹی نامہ کے لیے لکھنا چاہتے ہیں تو رابطے کا صفحہ استعمال کیجئے۔ آپ اپنی تحاریر رومن اردو میں بھی ارسال کرسکتے ہیں۔
اور میں آپ کو یہ بات تو بتانا ہی بھول گیا کہ آئی ٹی نامہ کے لیے ایک نئی تھیم تیار کی جارہی ہے جو ڈیسکٹاپ اور موبائل صارفین دونوں کے لیے یکساں مفید ہوگی۔ اپنی دعاؤں میں یاد رکھیے گا۔
محمد زہیر چوھان