موبی لنک جذبہ ، ایک بار پھر چوری پکڑی گئی

شاید آپکو یاد ہو کہ جب موبی لنک کی جانب سے جذبہ برانڈ متعارف کروایا گیا تھا تو بہت سے بلاگرز اور میڈیا سے تعلق رکھنے والے دیگر افراد نے اس کے لوگو کو چوری شدہ قرار دیا۔ موبی لنک کی جانب سے کھلم کھلا ایک برازیلین کمپنی کے لوگو کی نقل کی گئی اور چوری پکڑے جانے کے باوجود اسی لوگو کو برقرار رکھا گیا۔

خیر وہ بات تو پرانی ہوگئی ، نئی بات سنیں۔ موبی لنک کی جانب سے حال ہی میں ایک بار پھر سے جذبہ برانڈ کو متعارف کروایا گیا ہے۔ اب کی بار پاکستان کے مشہور گلوکار عاطف اسلم کو جاز جذبہ کا برانڈ ایمبیسیڈر منتخب کیا گیا ہے اور اسکے ساتھ ایک ویڈیو بھی ریلیز کی گئی ہے۔ یعنی کہ مختصراً پرانی ٹافی کو نئے کاغذ میں لپیٹ کر پیش کر دیا گیا ہے۔

کہاوت ہے کہ چور چوری سے جاتا ہے ہیرا پھیری سے نہیں، تو لیجئے جناب وہی ہوا، موبی لنک کی اس نئی میوزک ویڈیو میں عاطف اسلم کی کہانی دکھائی گئی ہے کہ کیسے انہوں نے اپنے جذبے کو برقرار رکھا اور لاکھ مشکلات کے باوجود ہمت نہ ہاری۔ اس ویڈیو کے اندر ایک سین کے دوران عاطف اسلم کے کنسرٹ کا پوسٹر دکھایا جاتاہے جس پر بعد ازاں ایک صاحب احتجاجی جلسہ کا پوسٹر لگا دیتے ہیں اور عاطف اسلم غصہ سے اسے اتار پھینکتے ہیں۔

خیر یہ تو کوئی خاص بات نہ ہوئی؟ لیکن جناب اگر غور کیا جائے تو عاطف اسلم کے کنسرٹ کا پوسٹر اصل میں سٹرنگز بینڈ کے ایک کنسرٹ پوسٹر کاچربہ ہے۔ جسے کراچی کے ایک ڈیزائنر وقاص صدیقی نے 2010 میں ڈیزائن کیا تھا۔

وقاص کا کہنا تھا کہ انہیں ہرگز امید نہ تھی کہ موبی لنک جیسی بڑی کمپنی ایسی حرکت کرے گی۔ ان کی کریٹیو ٹیم کو اس بات کا خیال رکھنا چاہیے تھا۔ گو کہ کمپنی کی جانب سے پروموشن مہم بہت اچھی رہی ہے لیکن ایک چھوٹی سے غلطی کی وجہ سے سب کیے کرائے پر پانی پھر گیا ہے۔ہر کسی کو چاہیے کہ وہ اپنے کام پر ٹھیک طرح سے توجہ دے اور دوسروں کے کام بھی کو بھی سراہے۔

اب دیکھنا یہ ہے کہ موبی لنک کی جانب سے اس بار کیا رویہ اختیار کیا جاتا ہے۔ مجھے تو یہی امید ہے کہ اس بار بھی ان کے کان پر جوں تک نہ رینگے گی چونکہ وہ پاکستان کی سب سے بڑی ٹیلی کام کمپنی جو ہے ، انہیں کسی اور کی کیا پرواہ؟ خیر جذبے سے جڑے رہیں شاید جلد کچھ اور بھی جاننے کو مل جائے۔

موبی لنک جذبہ کی جانب سے عاطف اسلم کے نئے گانے کی ویڈیو ملاحظہ کیجئے:

منبع