محمد زہیر چوھان
انٹرنیٹ کمپنی یاہو نے اعلان کیا ہے کہ وہ 18 سال پرانے یاہو میسنجر کو 5 اگست 2016 سے ختم کررہی ہے۔
اگر آپ پرانے انٹرنیٹ صارف ہیں تو یقیناً یاہو میسنجر اور یاہو چیٹ رومز کے بارے میں ضرور جانتے ہونگے۔ یاہو گنتی کی ان چند کمپنیوں میں شامل تھی جنہوں نے انسٹنٹ میسجنگ کی دنیا میں سب سے پہلے قدم رکھا۔ یاہو میسنجر میں پہلے صرف لکھے گئے پیغامات اور بعد ازاں، آڈیو ویڈیو کالنگ کی سہولت بھی شامل کردی گئی۔
یاہو، جو پچھلے کئی سال سے خسارے کا شکار ہے، اس سے قبل بھی کافی سروسز بند کرچکی ہے۔ کمپنی اعلان کے مطابق یاہو میسنجر کے وہ تمام پیغامات جو آپ کو میل باکس میں محفوظ تھے انہیں بھی 5 اگست کو ختم کردیا جائے گا، لہذا آپ انہیں تاریخ سے پہلے اپنے پاس ڈاؤنلوڈ کرلیں۔
یہاں یہ بات قابل ذکر ہے کہ کمپنی یاہو میسنجر کو ایک نئے انداز میں پیش کرنے کی خواہاں ہے۔ جو دور جدید کے تقاضوں سے ہم آہنگ اور دیگر کمپنیوں جیسے فیس بک اور وٹس ایپ کو ٹکر دے سکے۔ اس لیے کمپنی نے اپنے صارفین سے بھی مشورہ طلب کیا ہے۔
گو کہ ابھی یاہو کے نئے ورژن کے بارے میں حتمی طور پر معلومات فراہم نہیں کی گئی، تاہم یہ ونڈوز اور میکنٹوش ورژنر میں دستیاب ہوگا۔ جبکہ اینڈرائیڈ اور آئی او ایس کے لیے نیا ورژن پہلے ہی لانچ کیا چکا ہے۔