بالآخر فیس بک میں اردو زبان کو شامل کر لیا گیا

لیجئے جناب فیس بک ٹرانسلیشن ٹیم کی جانب سے دنیا کی مشہور ترین سوشل نیٹورکنگ ویب سائیٹ کے اردو ترجمے کا کام مکمل کر لیا گیا ہے۔ یعنی اب فیس بک اردو زبان میں بھی دستیاب ہے۔ گوکہ ٹوئٹر اور گوگل پلس کے مقابلے میں فیس بک کو اردو زبان شامل کرنے کا خیال کافی دیر سے آیا لیکن بھلا ہو ان تمام رضاکاروں کا جنہوں نے ہزاروں الفاظ اور جملوں کا درست اردو ترجمہ کیا۔

اگر آپ بھی فیس بک کو اپنی قومی زبان میں دیکھنا چاہتے ہیں تو اس کا طریقہ کار بہت آسان ہے، ہوم پیج پر نیوز فیڈ کے دائیں جانب نگاہ دوڑائیں تو اشتہارات کے نیچے آپ کو کاپی رائیٹ اور زبان دکھائی دے گی، جو کہ فی الوقت انگریزی ہوگی۔ اب آپ اس پر کلک کریں تو ایک پاپ اپ ونڈو کھلے گی جس میں دنیا بھر کی رنگ برنگی زبانیں شامل ہیں، یہاں سے اردو کا انتخاب کریں اور لیجئے آپ کی فیس بک پیج الائنمنٹ اور زبان اردو میں تبدیل ہوگئی۔

اگر آپ کو اس طریقہ سے زبان کا انتخاب کرنے میں دشواری پیش آرہی ہے تو پھر آپ اکاؤنٹ سیٹنگز میں جائیں اور وہاں پر سب سے نیچے زبان کا انتخاب کریں اور Save Changes کا بٹن دبائیں۔

گو کہ فیس بک میں اُردو زبان کا اضافہ تو کر دیا گیا ہے، تاہم اسے پڑھنے کا اصل مزہ خط نستعلیق میں ہے، ہماری کوشش ہوگی کہ اس حوالے سے بہت جلد کوئی پلگ ان تیار کیا جائے جو فیس بک میں اردو ٹیکسٹ کو نستعلیق فانٹ میں دکھائے۔